Read: 2 mins

Chakkar Mein Chakkar: Written and Narrated by Gautam Sukhija

Kabhi Kabhi sochta hun, ki main jaanwar hota to zaada achha hota, na paison ki fikar,na likhne pdhne ki tension, na kisi ko kuchh samjhaana aur na hi kisi ko apna banana. Na boss ki jhikk jhikk na ghadi ki tik-tik. Ghadi se yaad aaya kaise sab kuchh waqt mein simat kar reh gaya hai. Har ek cheez ki ek deadline set hogai hai, Arey, shaam hone se pehle ye task complete karna hai. Arey friday ko weekly report banani hai; Arey month ki expense sheet taiyyar karni hai; Arey shaam ko sabji ghar lekar jaani hai.

Kabhi kabhi sochta hun, ye sab karne se life ka standard to badh hi raha hai par dusre hi pal sochta hun ki standard to badh raha hai par life dheere dheere kam ho rahi hai. Matlab baat saari ghoom kar wapas waqt par hi aajati hai.  Yeh kya syaappa bana lia hai humne.

Ye sab tension khatam hoti hain to gharwaale tension dete hain. Beta tu shaadi kab karega? Shadi karle to bolte hain bacha kab karega? Arey, insaan hun koi machine nahin ki 25 mei shadi aur 26 ki deadline mein bachche bhi chahiye aur wo bhi judwa.

Kabhi kabhi sochta hun ki kash, Kash main ek average bachcha na hota, ya to top pe hota, sab kuchh mann laga ke karta, raat din mehnat karke NASA ka form bharta.  Fir MARS, JUPITER, SATURN mein ghoomne ko nikalta. Ya fir bilkul hi poor hota, na kisi ko hope hoti aur na hi main kuchh karta. Bas ghoomta, firta aur maje karta.

Ye average hona apne aap mein ek sazaa hai.

Na hum idhar ke rehte hain na udhar ke. Safed nav mein jhoolte rehte hain. Kabhi is chhor to kabhi us chhor. Humari life ke jo decision hain wo bhi hum thik se le nahin paate aur agar himmat jutaao, saans bharo aur kisi faisle par aao to line lag jaati hai advice dene waalon ki. Jo humein baat baat par ye samjhaane ki koshish karte hain ki life mein humne apne dum par kuchh kia hi nahi hai aur saath mein ye bhi jataate hain ki wo kya kya kar chuke hain. Us time hum hum humesha ki tarah ek average tarike se unki baat bade dhyan se sunte hain.

Wo advice kam deta hai aur apna QISSA zaad sunata hai ki bhai ne wo pichhla wala pahaad kis tarah khoda tha. Isme uska koi dosh nahin hai, agar kahaani ko ulta karlein aur apni apni jagah badal lein to humein samjh aaega ki harkatein to humaari bhi waisi hi hain.

To kul milaakar baat ye hai ki average life se nikalne ke liye koi raasta nahin hai. Aur dusre ki achhi dikhne wali life bhi bas door se chamak maarti hai, Andar se usmein bhi chhed hain.

Isliye sochta hun, achha hota agar ye jo Golmaal ka chakkar hai ye gol na hokar seedha hota. Matlab main insaan na hota balki jaanwar hota. Bas khaata, ghoomta, khelta, sota aur firse khaata.

4
penpaperandheart PodcastπŸ–‹πŸ“œβ€
Subscribe
Notify of
guest

This site uses Akismet to reduce spam. Learn how your comment data is processed.

0 Comments
Inline Feedbacks
View all comments